Kryetari i Komunës, Shpejtim Bulliqi i shoqëruar nga drejtori i Administratës, Shuajb Blakçori, drejtori i Shërbimeve Publike, Bahri Selimi dhe zëdhënësi i Komunës, Fatri Zhitia kanë qëndruar për disa ditë në vizitë zyrtare në Komunën Radenci të Sllovenisë, me ftesë të kryetarit të kësaj komune, Roman Leljak.
Takimin e parë e zhvilluan me kryetarin e Komunës së Radencit, Roman Leljak dhe bashkëpunëtorët e tij. Aty delegacioni nga Komuna e Podujevës u informuam për qeverisjen lokale të Radencit, funksionomin e komunës, si dhe u diskutua për mundësitë dhe format e bashkëpunimit mes dy komunave.
Pas kësaj bashkërisht vizituan impiantin e ujërave të zeza, stadiumin e qytetit, palestrën kryesore sportive, shkollën profesionale për Hoteleri dhe Turizëm si dhe fabrikën e njohur të ujit Radenska.
Vizita e kryetarit Bulliqi dhe bashkëpunëtorëve të tij përkoi me zhvillimin e maratonës 42 kilometërshe, një ngjarje e rëndësishme në mbarë Slloveninë që tërheq pjesëmarrës nga 26 shtete të botës. Në këtë ngjarje morën pjesë edhe kryetari i Komunës Bad Radkesburg nga Austria, z. Karl Lautner, si dhe drejtori gjeneral i fabrikës së Radenskas dhe kryetari i Komunës së Radencit, z. Roman Leljak.
Kryetari Bulliqi i falënderoi përzemërsisht kryetarin Leljak dhe bashkëpunëtorët e tij për pritjen miqësore në Slloveni si dhe tha se kjo vizitë do të ndikojë drejtpërdrejt në krijimin e partneritetit mes dy komunave tona në interes për të dyja palët.
