Stephen Richards nga Liverpooli para 25 vitesh bashkë me mijëra ushtarë britanikë kishin zbarkuar në Kosovë për ta parandaluar katastrofën humanitare.
E pas një çerek shekulli ai u rikthye në vendin që e kishte gjetur në vuajtje të llahtarshme.
Richards tregon se po përjeton shumë emocione shkaku i kujtimeve të dhimbshme që ka për Kosovën.
“Kjo është hera e parë që po kthehem pas 25 vitesh në Kosovë. E kam menduar të vija këtu gjatë vitit të kaluar por kisha hezitime. Të jem i sinqertë me ju me duket krejtësisht e pabesueshme se si paska ndryshuar vendi. Nuk mund ta përshkruaj me fjalë se si po ndihem në këto momente, kam shumë kujtime nga ky vend”, tregoi veterani i ushtrisë britanike.
“Kur erdha nga Kaçaniku në Prishtinë, detyra jonë ishte të patrullonim rrugëve dhe ta vëzhgonim situatën. Kam parë shumë mizori gjatë atyre ditëve në Prishtinë. Unë isha i përfshirë në gjetjen e një dhome torture në qendër të qytetit që kishte shërbyer si seli për policinë serbe. Kemi parë gjëra të tmerrshme brenda, njerëzit ishin torturuar aty në forma të ndryshme. Kur i zbuluam ato dhoma të torturave, menjëherë i kemi informuar të tjerët”, tha ai.
Stephen Richards, tani 50 vjeçar, ka një dëshirë që kërkon t’i përmbushet.
“Dua shumë që t’i takoj atë fëmijë që i shpëtuam gjatë luftës, tani besoj se janë rritur shumë. Dua t’i shoh e të flas me ta për kujtimet e përbashkëta, kam shumë emocione. Kurrë nuk e kisha menduar që do të isha në këtë situatë kështu. Jam shumë krenar qe kemi arritur të kontribuojmë në çlirimin e Kosovës dhe ti shpëtojmë mijëra njerëz”.
Trupat britanike hynë për herë të parë në Kosovë me trupat e tjera të NATO-s më 12 qershor 1999 nën komandën e ish-gjeneralit, Sir Mike Jackson.
