Kryetari i Komunës së Podujevës, z.Shpejtim Bulliqi, ka zhvilluar një takim me afaristët llapjanë me të cilët ka diskutuar për një varg çështjesh.
Tema kyçe e këtij takimi që u mbajt të mërkurën në sallën e Kuvendit Komunal ishte parcializimi i Zonës Industriale për të cilën është duke u punuar plani i hollësishëm. Kryetari Bulliqi u ka ofruar informatat e nevojshme afaristëve rreth këtij projekti që do t’i jap hov zhvillimit ekonomik të Podujevës. Ai i dëgjoi me vëmendje kërkesat dhe nevojat e përfaqësuesve të bizneseve lokale që synojnë të marrin parcela në këtë hapësirë për të zhvilluar afarizmin e tyre. Kjo, sipas kryetarit të Komunës, po bëhet me qëllim të inkorporimit të ideve të tyre në këtë plan të hollësishëm të zonës.
Në takim u diskutua edhe për klimën e të bërit biznes në Podujevë, sfidat me të cilat ballafaqohen bizneset tona si dhe mbështetjen që Komuna po e ofron për zhvillimin e veprimtarive të tyre afariste.
Kryetari i falënderoi të gjithë përfaqësuesit e bizneseve lokale për pjesëmarrjen dhe kontributin në këtë takim.
