Faton Hajrizi i ka dërguar tri mesazhe nga arratia.
I dënuar me 27 vite burgim për vrasjen e një ushtari rus në vitin 2000, 40-vjeçari është deklaruar mbi arsyet e arratisjes nga burgu i Smrekonicës të shtunën në mëngjes.
Ai ka lëshuar një lajmërim për “popullin e Kosovës” dhe dy të tjera për institucionet shtetërore.
Hajrizi tha se populli “duhet ta dijë” se nuk është njeri i rrezikshëm dhe nuk do t’i bëjë keq askujt.
Popullit i bëj thirrje që të mos frikohen nga unë. Nuk ka rrezik prej meje. Asnjë qime e flokut nuk do t’i preket askujt. Nuk dua me përsërit veprën as kundërvajtje nuk do të bëj në komunikacion”, ka thënë ai. “Unë kam vepruar në veri të Kosovës edhe pas luftës kur kam qenë në arrati. Unë i kam ndjek Rojet e Ibrit, pikërisht unë. Po du me ju thënë se nuk jam armik i popullit unë. Ju e dini mirë se unë burgun e kam kryer para një viti e gjysmë. 2/3-at unë i kam bërë para një viti e gjysmë, kur është dashtë të lirohem nga burgu”
Për organet shtetërore, Hajrizi ka dërguar dy mesazhe: se duhet të përmirësohen kushtet në burgje dhe se nuk do të kthehet më aty.
Ai ka përmendur edhe Gani Gecin, ish-deputetin e Kuvendit të Kosovës, i cili shkoi në vuajtje të dënimit para tri vite e gjysmë në burgun e Smrekonicës dhe u lirua këtë vit.
“Në këtë gjendje nuk kthehem më në burg. Aty nuk ka rregull, nuk trajtohen të gjithë njësoj. Një shembull po ta marrë, unë një herë kam mungue në rresht, jam kanë i lodhur dhe u dashke me pushu, mbikëqyrësi nuk më linte me flejt. Po pse vallë Gani Gecin nuk e qitshin në rresht kurrë? Pse vallë Gani Gecin nuk e provokojshin? Pse vallë Gani Gecit nuk ia shtronin zullumin? Për çka? Sepse ju nuk keni respekt, veç tuteni prej njerëzve”, ka thënë ai.
Faton Hajrizi u arratis nga burgu të shtunën gjatë periudhës kohore nga ora 05:00 e mëngjesit deri në orën 07:00.
I arratisuri më i famshëm në Kosovë arriti që fillimisht t’i shfrytëzojë çarçafët e shtratit, të cilët i lidhi në radiatorin e dhomës ku ai ishte i vendosur.
Në këtë mënyrë, Hajrizi arriti që të largohet nga dhoma e burgut përmes dritares në katin e dytë dhe kështu ia doli të depërtojë në katin e parë.
Nga aty, Hajrizi e kaloi rrethojën e jashtme të burgut dhe u arratis për herën e nëntë.
Qendra Korrektuese e Smrekonicës ku Hajrizi vuante dënimin është institucion i tipit të hapur.
Arratisjen e tij e ka konfirmuar edhe Shërbimi Korrektues i Kosovës dhe ka njoftuar se për këtë çështje është njoftuar Policia dhe janë suspenduar dy oficerë.
Faton Hajrizi ishte dënuar për vrasjen e një ushtari rus. Në kohën kur ai e kishte kryer vrasjen ishte rreth 15-vjeçar. Për këtë vrasje, ai ishte dënuar 27 vjet burg.
