Mbahen homazhe për Komandantin Zahir Pajaziti dhe shënohet Dita e Shkollës në Orllan
Sot në 62-vjetorin e lindjes së Heroit Kombëtar, Zahir Pajaziti, u bënë homazhe pranë kompleksit memorial “Zahir Pajaziti” në Orllan, për të nderuar veprimtarinë dhe heroizmin e pashoq të tij në shërbim të atdheut dhe lirisë.
Në homazhe morën pjesë Kryetari i Komunës, Shpejtim Bulliqi, deputeti Fitim Haziri, drejtorë dhe asamblistë komunalë, familja Pajaziti, përfaqësues të shoqatave të dala nga lufta dhe qytetarë.
Pas homazheve u mbajt manifestimi për Ditën e Shkollës në Orllan, që me krenari mban emrin e tij.
Më këtë rast Kryetari i Komunës, Shpejtim Bulliqi mbajti një fjalë rasti ku tha “Sot, ndërsa kujtojmë jetën dhe veprën e Komandantit Zahir Pajaziti, le të marrim nga ai forcë dhe inspirim për të punuar më shumë dhe për të qenë gjithmonë në shërbim të vendit tonë dhe të brezave të ardhshëm. Kjo është mënyra më e mirë për ta nderuar emrin e tij duke ndërtuar një Kosovë të fortë e të përparuar.
Ju dëshiroj të gjithë nxënësve e mësimdhënësve një vit të mbarë shkollor, me suksese dhe arritje të reja”.
Fjalë rasti mbajtën edhe Bajram Pajaziti, vëllau i heroit Zahir Pajaziti dhe drejtori i shkollës në Orllan, Naim Bajrami.
Për shënimin e kësaj dite, mësimdhënësit dhe nxënësit e shkollës kishin përgatitur një program të pasur kulturor me këngë e valle.
