Stadiumi i qytetit në Suharekë, nesër është arena ku ballafaqohen dy skuadrat më të mira të edicionit të kaluar në Kosovë.
Kampioni është nikoqir i nënkampionit.
Ballkani dhe Llapi nuk po kalojnë momente të mira kohëve të fundit, njofton Klankosova.tv.
“Xhebrailat” pos që kanë mbetur 10 pikë prapa liderit të tabelës, Dritës, ata janë eliminuar edhe nga Kupa e Kosovës, bile nga një ekip i një rangu më të ulët të garave, siç është Rilindja 1974.
Në Kupë janë ende, por llapjanët kanë “harruar” kur kanë fituar në kampionat.
Skuadra nga Podujeva ka plot nëntë ndeshje pa fitore, prej tyre pesë humbje e katër barazime, raporton Klankosova.tv.
E pikërisht ndaj Llapit, “portokall e zinjtë” po kërkojnë ta nisin rikthimin te rezultatet pozitive.
Me anë të një postimi në faqen zyrtare të klubit në facebook, suharekasit bëjnë të ditur synimet e objektivat e tyre.
“Ne kemi humbur vetëm disa beteja, por lufta është e gjatë dhe ajo fitohet prej atyre që punojnë shumë, e mbi të gjitha prej atyre që besojnë në forcën dhe kualitetin e vetë. Ne e kemi dëshmuar se jemi të tillë dhe kështu do të luftojmë ndeshje pas ndeshje, betejë pas beteje, për t’u kthyer aty ku të gjithë presin dhe janë mësuar në na shohin”, shkruhet në postimin e tri herë kampionëve të Kosovës.
Që objektivi të arrihet, Ballkani i do tifozët e vetë të motivuar për këtë ndeshje.
“Nesër, njejtë si përherë, të bashkuar në stadiumin e qytetit në Suharekë, të japim gjithçka nga vetja, për ta filluar rikthimin e madh. Na priftë e mbara, KAMPIONË” përfundon shkrimi i suharekasëve.
Nga ana tjetër, podujevasit ende nuk kan bërë ndonjë postim për përballjen e nesërme.
