Presidenti serb Aleksandar Vuçiq ka zbuluar në një seancë të qeverisë se ka informacione sipas të cilave qeveria e Prishtinës do të akuzojë serbët për shpërthimin e kanalit Ibër-Lepenec në ditët në vijim, raporton media serbe Danas.
Dushan Janjiq, drejtor i Forumit për Marrëdhënie Ndëretnike, thotë për Danas se kjo nuk është asgjë e re dhe se qeveria në Prishtinë ka filluar të bëjë akuza kur kryeministri i Kosovës Albin Kurti fillimisht e karakterizoi këtë ngjarje si akt terrorist.
Duke hapur seancën, Vuçiq fillimisht foli për situatën në Kosovë dhe përgjegjësinë për shpërthimin e kanalit Ibër-Lepenec që ndodhi më 29 nëntor.
“Në Kosovë e Metohi populli ynë po lufton ashpër për mbijetesë dhe legjitimitet politik. Ajo që mund t’ju them është se regjimi i Kurtit në ditët në vijim do t’i shpallë fajtorë serbët pa prova materiale për devijimin e kanalit Ibër-Lepenec me qëllim të qartë politik. Kuptimi dhe qëllimi është që të përpiqemi në çdo mënyrë të ndalojmë pjesëmarrjen e Listës Serbe në zgjedhjet e ardhshme”, ka theksuar Vuçiq.
Disa ditë pas shpërthimit, Vuçiq deklaroi se Serbia nuk kishte asnjë lidhje me të dhe se ai mbështet hapjen e një hetimi ndërkombëtar për të përcaktuar se çfarë ndodhi.
Është interesant fakti se Vuçiq këtë temë po e vendos në rend dite në kohën kur ka bllokada studentore në gjithë Serbinë dhe duket se ato nuk do të ndalen së shpejti.
Duke iu përgjigjur pyetjes se a është qëllimi i Vuçiqit që të shfrytëzojë temën e Kosovës dhe shpërthimin e kanalit Ibër-Lepenec për të larguar deri diku vëmendjen nga protestat, bllokadat dhe qytetarët e pakënaqur, kryetari i Forumit për Marrëdhënie Ndëretnike, Dushan Janjiq, tha se për një kohë të gjatë po bëjnë përpjekje për ta rikthyer në plan të parë çështjen e Kosovës, për të larguar vëmendjen dhe për të lehtësuar presionin ndaj qeverisë, i cili ushtrohet përditë nga problemet e brendshme.
Janjiq thekson se njoftimi i Vuçiqit se Kosova do të akuzojë Serbinë për shpërthimin në Zubin Potok nuk është diçka e re.
Kurti tashmë e ka bërë këtë. Përkufizimi i tij i parë ishte se ishte një akt terrorizmi”, përfundon ai.
