Ministrja e Punëve të Jashtme të Kosovës, Donika Gërvalla e ka kritikuar kryeministrin e Shqipërisë, Edi Rama për fjalimin e tij sot në seancën e përbashkët të qeverive shqiptare, duke e vlerësuar si keqpërdorim të foltorës, raporton GazetaDemos.
Gërvalla e akuzoi Ramën për bërje fushate gjatë fjalimit të tij, në të cilin përmendi edhe Gjykatën Speciale dhe gjykimin e ish-krerëve të UÇK-së.
“Mbledhja e dy Kuvendeve ishte e jashtëzakonshme, historike. Për herë të parë në Prishtinë mbahet mbledhje e dy Kuvendeve tona. Atmosfera mes deputetëve e ministrave është e shkëlqyer. Fjalimi i z. Rama nuk u përshtat me këtë atmosferë që e patëm. Ishte një fjalim i cili fort e keqpërdori mikpritjen e Kosovës. Ai që vjen me bë fushatë, duhet të vijë të bëjë fushatë transparente kundër Qeverisë, dhe nuk ka nevojë të keqpërdor foltorën e Kuvendit. Ishte jashtëzakonisht e pakëndëshme atmosfera ndërkohë që mbahej një fjalim i tillë”, tha Gërvalla në KlanKosova.
