Fillimisht ishte arsyetuar se do të shkonte në një koncert në Sallën e Kuqe dhe të martën e ka shmangur pyetjen se “në Dragash e Malishevë duhet me shku”.
Kryeministri Albin Kurti ka vazhduar ikjen nga Prokuroria Speciale.
Prokuroria Speciale e kishte ftuar kryeministrin Albin Kurti për intervistim në cilësinë e dëshmitarit, por që prej 16 dhjetorit kur i ishte bërë ftesa, ai ka refuzuar të shkojë.
Ani pse Prokuroria Speciale nuk ka treguar se për cilin rast bëhet fjalë, në ftesë ishte cekur numri i lëndës PPS/62/2023 që lidhet me lëndën e arrestimit të Irfan Lipovicës dhe Hafiz Garës.
Të dy janë në mesin e të dyshuarve për skandalin e madh me rezervat shtetërore.
Kurti u bë i gjallë të hënën e kaluar dhe refuzoi të fliste teksa, pastaj dha një arsyetim skandaloz: “Se do të shkonte në një koncert në Sallën e Kuqe”.
Ai bëri edhe një tjetër veprim të pazakontë: Ftoi prokurorët e rastit që t’i shkonin në zyrën e tij.
Njohësit e çështjeve juridike kanë deklaruar se kjo ishte tallje e Kurtit me Prokurorinë Speciale dhe sistemin e drejtësisë.
Por për skandalin nga i cili është duke ikur kryeministri Kurti kishim raportuar në muajin tetor.
Një hulumtim i Paparacit dëshmonte përfshirjen direkte të ministres Rozeta Hajdari në aferën e Rezervës Shtetërore përmes komunikimeve me e-maile. Në të njëjtin proces, është implikuar edhe kryeministri Kurti.
Kurti i ka nënshkruar dy vendime të dyshimta brenda pak ditëve në shkurt të vitit 2022, për Rezervën Shtetërore.
Vendimi i parë, i nxjerrë në një mbledhje të qeverisë më 23 shkurt 2022, parashihte alokimin e 10 milionë eurove nga Pakoja e Ringjalljes Ekonomike për rritjen e Rezervave Shtetërore.
Mjetet do të vendoseshin në dispozicion të Ministrisë së Industrisë, Ndërmarrësisë dhe Tregtisë, të udhëhequr nga Rozeta Hajdari.
Dy ditë më vonë, në 25 shkurt të vitit 2022, MINT-i do t’ia parashtronte një kërkesë absurde kryeministrit Kurti: vendimi për furnizim i Rezervave Shtetërore të përjashtonte prokurimin publik. Rrjedhimisht, të shkelej Ligji për Prokurimin Publik.
Kësaj kërkese, Kurti i ishte përgjigjur me “PO”. Ky ishte vendimi i dytë.
Lëndën e kontratës e kishte klasifikuar si sekret shtetëror.
Me klasifikimin si sekret shtetëror të lëndës së kontratës duke u thirrur në Ligjin për Rezervat Shtetërore të Mallrave dhe Rregulloren për Qëllime të Mbrojtjes dhe Sigurisë, Kurti dyshohet se i keqpërdori dispozitat ligjore për një lëndë që nuk mund të klasifikohej si sekrete.
Ky vendim i hapi rrugë fillimit të negociatave për blerjen e mallit, në të cilat ministrja Rozeta Hajdari implikohet tërësisht në skandal.
Nga 10 milionë euro të dedikuara për blerjen e grurit, vajit e sheqerit, nuk kanë ardhur shumica prej mallrave.
Përpos grurit, sasia e të cilit ka ardhur në shumicë, por mungojnë 52 tonë, vaji dhe sheqeri nuk ka ardhur kurrë./Paparaci.
