Sot do të hapet zyrtarisht Ambasada e Republikës së Kosovës në Kuala Lumpur, Malajzi.
Kështu ka njoftuar ministrja në detyrë e Ministrisë së Punëve të Jashtme dhe Diasporës, Donika Gërvalla, e cila ka theksuar se hapja e ambasadës është një moment i rëndësishëm dhe një hap konkret në përpjekjet e Kosovës për të forcuar lidhjet me vendet e Azisë Juglindore dhe për të zgjeruar praninë diplomatike në këtë rajon të rëndësishëm strategjik.
“Malajzia ka qenë një nga vendet e para që njohu pavarësinë e Kosovës, dhe hapja e ambasadës sonë në zemër të Kuala Lumpurit është një dëshmi e përkushtimit të përbashkët dhe e punës intensive që kemi investuar me vite për të thelluar këtë miqësi të ndërtuar me respekt e mirëkuptim mes dy vendeve tona”, tha ajo
Hapja e Ambasadës në Kuala Lumpur nuk është vetëm një zgjerim i pranisë sonë diplomatike, por edhe një shprehje konkrete e vullnetit tonë për të ndërtuar ura miqësie, bashkëpunimi dhe zhvillimi me një nga rajonet më dinamike në botë. Jemi mirënjohës për mbështetjen e vazhdueshme të Malajzisë dhe të përkushtuar për ta çuar këtë partneritet në nivele të reja,” ka thënë tutje Gërvalla.
