Qyteti i Podujevës sot është tronditur nga një tjetër ngjarje e rëndë që ka ndodhur në mes të ditës, ku një person është therur me thikë, raporton Gazeta Sinjali.
Sinjali mëson ekskluzivisht se ngjarja ka ndodhur në rrugën “Ilir Konushefci”, ku një 39-vjeçar, I.K, është paraqitur në Stacionin Policor rreth orës 12:00, i gjakosur dhe i lënduar, duke raportuar se ishte sulmuar me thikë nga L.F rreth 52-vjeçar.
Burimet brenda hetuesisë thonë se I.K kishte dy plagë të shkaktuara nga thika, një në dorë dhe një në bark. Ai është marrë menjëherë nga autoambulanca dhe është dërguar në QKUK për trajtim emergjent.
Në vendin e ngjarjes kanë dalë njësitë relevante – hetues, patrulla dhe forenzikë – të cilët kanë nisur menjëherë ekzaminimin dhe mbledhjen e provave.
Pas ngjarjes, i dyshuari është paraqitur vetë në stacionin policor, ku ka dorëzuar edhe mjetin e krimit – thikën me të cilën dyshohet se kreu sulmin. Ai është intervistuar në prani të avokatit dhe thika është sekuestruar si provë materiale.
Lidhur me rastin, Prokurori ka udhëruar ndalimin e të dyshuarit për 48 orë dhe inicimin e rastit për “Lëndim të rëndë trupor” dhe “Mbajtje të paautorizuar të armës”.
Gazeta Sinjali do të sjellë detaje të reja lidhur me gjendjen shëndetësore të viktimës dhe rrjedhën e hetimeve ndaj të dyshuarit.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
Sinjali – aty ku e vërteta flet para lajmit!
