Me rastin e Ditës së Dëshmorëve, Kryetari i Komunës së Podujevës, Shpejtim Bulliqi, ka bërë homazhe në nderim të atyre që dhanë jetën për lirinë e Kosovës. Homazhet filluan në Kompleksin e Komandantit Legjendar Zahir Pajaziti në Orllan, për të vazhduar më pas në “Kompleksin Memorial të Dëshmorëve” në Penuhë.
Në fjalën e tij, kryetari Bulliqi theksoi rëndësinë e kujtimit dhe respektit për sakrificën e dëshmorëve, duke vënë në pah edhe rolin e veçantë të familjeve të tyre.
“Një mirënjohje e veçantë për familjet e dëshmorëve, pasiqë ato i brymosën bijtë e tyre me atdhedashuri e sakrificë,” tha ai.
Bulliqi shtoi se kjo ditë përveç mallëngjimit dhe krenarisë, është edhe një kujtesë për obligimin që kanë të gjallët – për të punuar me përkushtim për një Kosovë më të drejtë dhe më të zhvilluar.
Në fund, ai shprehu nderimin e tij me fjalët:
“Lavdi e përjetshme dëshmorëve të kombit! Lavdi e nderime gjithë të rënëve në luftën për lirinë e Kosovës! Respekt e mirënjohje luftëtarëve të lirisë!”
