Deputetja e Lidhjes Demokratike të Kosovës (LDK), Hykmete Bajrami, ka kritikuar ashpër Lëvizjen Vetëvendosje (VV), duke e akuzuar për mungesë serioziteti dhe vullneti në procesin e konstituimit të Kuvendit të Kosovës.
Bajrami ka bërë të ditur se kryesuesi i seancës, Avni Dehari nga VV-ja, ka kërkuar që takimet për përpjekje rreth konstituimit të mbahen vetëm një herë në javë – ndryshe nga sa përcakton Rregullorja e Kuvendit, e cila parasheh mbledhje çdo 48 orë.
E shohim këtë si një indikacion shtesë se VV-ja nuk është absolutisht e interesuar për ta bërë konstituimin e Kuvendit. Ata mungesën e institucioneve e kanë reduktuar në problem të mbledhjes çdo 48 orë,” deklaroi Bajrami, duke shtuar se kërkesa e tillë është refuzuar nga partitë e tjera.
“Është fatkeqësi që u mblodhëm për të 17-ën herë dhe nuk lëvizëm as edhe një hap përpara”, tha Bajrami, duke e cilësuar situatën si të papranueshme për vendin./IndeksOnline/
