Gjykata Themelore në Ferizaj ka vendosur të vazhdojë paraburgimin edhe për nga dy muaj për gjashtë të dyshuarit për ndihmë në vrasjen e rreshterit të Policisë së Kosovës, Muhamed Lika.
Gjykata Themelore në Ferizaj ka miratuar kërkesën e Prokurorisë për vazhdimin e masës së paraburgimit edhe për nga 2 muaj ndaj gjashtë të pandehurve – Haki Bela, Rilind Murati, Vatan Çaka, Edmond Lika, Shkëlqim Kuka dhe Diamant Gashi – të cilët dyshohen për përfshirje në vrasjen e rreshterit të Policisë së Kosovës, Muhamed Lika.
Sipas vendimit të gjykatës që ka publikuar Dukagjini, ekziston dyshimi i bazuar mirë se të pandehurit, duke vepruar në bashkëkryerje dhe me përgatitje paraprake, kanë ndihmuar të miturin R.B. që më 1 prill të këtij, në Kaçanik, të kryejë vrasjen e zyrtarit policor.
Sipas vlerësimit të Gjyqtares së procedurës paraprake rrethanat e rastit flasin se qëndron arsyeja për vazhdimin e masës se paraburgimit sepse ekziston dyshimi i bazuar se me datë 01.04.2025, rreth orës 23:00, në Kaçanik, në rrugën “Idriz Seferi”, përkatësisht në katin e II-të, të hyrjes së ndërtesës, të pandehurit duke vepruar në bashkëkryerje, me dashje dhe përgatitje paraprake kanë planifikuar për ta privuar nga jeta tani të ndjerin zyrtarin e policisë, rreshter Muhamet Lika, me detyrë në Stacionin Policor në Kaçanik”, thuhet në aktvendimin e gjykatës.
Më tej thuhet se, Prokuroria ka ndërmarrë një sërë veprimesh hetimore në bashkëpunim me Policinë e Kosovës, duke përfshirë urdhëresa për autopsi, analiza të ADN-së, ekzaminim të telefonave, tërheqje të pamjeve nga kamerat e sigurisë dhe masa të veçanta hetimore si përgjimet dhe analizat e transaksioneve financiare.
Gjykata vlerëson se hetimet ende nuk janë përmbyllur dhe disa nga raportet e ekspertizave ende nuk janë pranuar.
Gjithashtu, gjykata vlerëson se ekziston rreziku i ndikimit të të pandehurve te dëshmitarët dhe palët e përfshira në proces, si dhe rreziku i përsëritjes së veprës penale, duke qenë se disa prej tyre janë të njohur për autoritetet dhe janë të përfshirë edhe në raste të tjera kriminale.
