Guy Labrecque, një ekspert i turbinave nga kompania e njohur amerikane ‘General Electric‘, është duke punuar në riparimin e gjeneratorit në njësinë B2 të termocentralit Kosova B në Korporatën Energjetike të Kosovës (KEK).
Labrecque, një ekspert francez i elektro-energjisë, e ka nisur punën e tij për riparimin e prishjeve në termocentralin Kosova B në fillim të muajit qershor.
Shefi i Operimeve në KEK, Luigj Imeri, kishte postuar një fotografi me ekspertin francez gjatë punimeve në njësinë B2.
Guy, i cili është një ekspert i kompanisë së njohur amerikane ‘General Electric’, e cila është kompania e vetme e licencuar për riparime në KEK, do të dalë në pension sapo të përfundojë punimet në termocentralin Kosova B.
Të paktën kështu thuhej në postimin e Imerit në fillim të qershorit.
“Guy, një ekspert i GE nga Franca, do ta përfundojë karrierën e tij duke udhëhequr riparimin e 200-të të gjeneratorit. Ai do ta arrijë këtë me riparimin e fundit të gjeneratorit në njësinë B2 të termocentralit Kosova B”, shkruante Imeri më 3 qershor.
