Dy zyrtarë të Policisë së Kosovës nga Peja, nënkoloneli Nexhat Gutiq dhe kapiteni Togeri Tunë Preka, janë dërguar në mbajtje për 48 orë, pas një hetimi që po zhvillohet ndaj tyre për dyshime për ndërhyrje të paautorizuar në procedurat policore.
Për Insajderin, Prokurorja e Krimeve të Rënda në Prokurorinë Themelore të Pejës, Valbona Disha Haxhosaj, ka dhënë detaje lidhur me rastin.
“Prokuroria Themelore në Pejë, pas pranimit të informatave nga një medium lidhur me këtë çështje, ka filluar ndërmarrjen e veprimeve hetimore ndaj personave që mund të jenë të përfshirë në elemente të veprave penale.
Pas punës intensive të Prokurorit të Shtetit dhe Inspektoriatit Policor të Kosovës, dy zyrtarë policorë, pas intervistimit si të dyshuar për kryerje të veprave penale, me urdhër të Prokurorit të Shtetit janë ndaluar fillimisht për 48 orë.
Prokurori i Shtetit, brenda afatit ligjor, do të parashtrojë kërkesë për sigurimin e të pandehurve në procedurë penale. Prokuroria Themelore e Pejës, njëkohësisht, do të ndërmarrë të gjitha veprimet e nevojshme hetimore për këtë çështje penale deri në ndriçimin e plotë të saj,” ka deklaruar Disha-Haxhosja”, ka deklaruar Disha-Haxhosja.
Ditë më pare Insajderi kishte raportuar se: Inspektorati Policor i Kosovës (IPK) ka nisur hetime preliminare ndaj dy zyrtarëve të Policisë së Kosovës, një nënkoloneli dhe një kapiteni, për ndërhyrje të paautorizuar në një rast në Pejë më 28 maj 2025. Ata dyshohet se nuk kanë përcjellë rastin për hetim dhe nuk e kanë njoftuar Prokurorinë, duke i shqiptuar vetëm një tiketë për kundërvajtje një personi që kishte penguar punën e policisë gjatë një aksidenti trafiku. IPK ka rekomanduar suspendimin e dy zyrtarëve derisa hetimet vazhdojnë në bashkëpunim me Prokurorinë Themelore të Pejës, me qëllim ndriçimin e plotë të rrethanave dhe garantimin e integritetit të procesit hetimor./Insajderi
