Një ngjarje e pazakontë është raportuar të dielën në mëngjes në qytetin e Istogut, ku një person është parë i zhveshur duke ndalur automjetet në rrugë, ndërsa dyshohet se paraprakisht kishte pasur me vete një armë automatike.
Burime të Sinjalit bëjnë me dije se më 22 qershor 2025, rreth orës 09:00, në rrugën “Hysen Bujupi” qytetarët kanë alarmuar Policinë për një person të zhveshur që po sillte shqetësim në komunikacion. Njësia patrulluese ka dalë menjëherë në vendin e ngjarjes dhe ka arrestuar personin në fjalë, i cili është identifikuar si L.Z., 25 vjeçar, banues në Istog.
Në stacionin policor është vërejtur se i dyshuari fliste në mënyrë të çrregullt dhe me halucinacione, ndaj është ftuar mjeku kujdestar nga QMF për t’i administruar qetësues për shkak të gjendjes agresive.
Pas kontaktit me familjarët dhe deklarimeve të dëshmitarëve, është bërë e ditur se L.Z kishte dalë nga shtëpia me një armë AK-47. Hetuesit kanë bastisur vendin ku ai kishte qëndruar natën e kaluar dhe kanë gjetur armën automatike, e cila është konfiskuar.
Me vendim të Prokurores Kujdestare, ndaj të dyshuarit është caktuar masa e ndalimit prej 48 orësh, ndërsa i njëjti është dërguar për trajtim në Klinikën Psikiatrike në Spitalin Rajonal të Pejës.
Rasti është iniciuar si “Mbajtje në pronësi, kontroll ose posedim të paautorizuar të armëve” dhe është nën hetim.
