Banorët e fshatit Gerdoc vazhdojnë të kërkojnë ndërtimin e një shkolle të re, një kërkesë që sipas tyre është bërë tashmë prej vitesh, por që deri më sot nuk ka gjetur mbështetjen e nevojshme nga Komuna e Podujevës.
Në seancën e fundit të Kuvendit Komunal, as kësaj radhe nuk është trajtuar çështja e shkollës në Gerdoc, duke lënë të zhgënjyer qytetarët e kësaj zone.
Një ndër zërat që ka ngritur këtë shqetësim është edhe Xhemajl Hasani, i cili në një reagim publik tha:
“Ka kohë që banorët e Gerdocit kanë kërkuar ndërtimin e një shkolle të re, por për fat të keq, kjo kërkesë po shpërfillet vazhdimisht. Institucionet lokale nuk kanë dhënë ende asnjë shenjë konkrete se do ta përfshijnë këtë projekt në planet zhvillimore.”
Hasani gjithashtu theksoi se ky fshat kishte mbështetur për herë të parë partinë në pushtet gjatë zgjedhjeve të fundit lokale, duke shtuar se është e papranueshme që banorët të harrohen menjëherë pas zgjedhjeve.
