Zëvendëskryeministri i Maqedonisë së Veriut e mirëpret si “mik” e “vëlla” kryeministrin në detyrë të Kosovës para Samitit të liderëve të BE-së dhe atyre të Ballkanin Perëndimor në Shkup.
Zëvendëskryeministri i Maqedonisë së Veriut, Izet Mexheti, ka thënë se ka pritur në pikën kufitare kryeministrin në detyrë të Kosovës, Albin Kurti, i cili do të marrë pjesë në samitin e liderëve të Bashkimit Evropian dhe vendeve të Ballkanit Perëndimor në Shkup, në kuadër të përpjekjeve për përshpejtimin e zbatimit të Planit të Rritjes.
“E mirëprita si mik, si vëlla, si udhëheqës të një shteti që na qëndron pranë në çdo kohë”, ka shkruar Mexhiti në “Facebook” të hënën në mbrëmje, duke shtuar se “kjo pritje ishte një shenjë respekti dhe vlerësimi për lidhjet që na bashkojnë, për qasjen e përbashkët ndaj sfidave të rajonit, dhe për besimin në të ardhmen tonë evropiane”.
Komisionarja për Zgjerim e BE-së, Marta Kos, do t’i grumbullojë të hënën gjashtë liderët e vendeve të rajonit të Ballkanit Perëndimor në një drekë pune në Shkup në kuadër të përpjekjeve për përshpejtimin e zbatimit të Planit të Rritjes prej 6 miliardë eurosh – një paketë madhore e asistencës financiare për periudhën 2024-2027.
