Në Bulevardin e Qytetit sot u hap Panairi “Zhvillimi dhe Promovimi i Bizneseve përmes Panairit”, i cili është organizuar nga D&D Business Support Center, me përkrahje nga Ministria e Zhvillimit Rajonal dhe në bashkëpunim me Komunën e Podujevës.
Në hapje të panairit morën pjesë, nënkryetarja e Komunës, Marigona Lahu, drejtori i Drejtorisë së Planifikimit dhe Zhvillimit Ekonomik, Vigan Salihu dhe drejtoresha e Kadastrit, Saranda Stublla.
Në fjalën e saj përshëndetëse, nënkryetarja Lahu përgëzoi gratë për angazhimin dhe kontributin e tyre në zhvillimin ekonomik vendor.
“Ky panair është dëshmi e punës dhe fuqisë së grave, ku përmes angazhimit, kreativitetit dhe përkushtimit, ato po e forcojnë rolin e gruas në ekonomi dhe po i japin një dimension të ri zhvillimit lokal”, tha Lahu.
Qëllimi i panairit është të promovojë dhe fuqizojë gratë sipërmarrëse nga zonat rurale të Komunës së Podujevës, duke iu ofruar atyre hapësirë për të prezantuar produktet e tyre ushqimore dhe artizanale, si dhe për të ndërtuar lidhje të reja me komunitetin dhe tregun.
Panairi do të qëndrojë i hapur deri më 18 korrik 2025, prej orës 09:30 deri në 20:00.
Ftojmë të gjithë qytetarët që të vizitojnë panairin dhe të mbështesin gratë llapjane!
