Një tjetër incident shqetësues ka ndodhur në Qendrën Klinike Universitare të Kosovës, ku dy mjekë urologë janë përleshur fizikisht mes vete për shkak të një mosmarrëveshjeje rreth organizimit të planit të operacioneve, raporton Insajderi.
Burime të gazetës Insajderi bëjnë të ditur se në këtë përleshje janë përfshirë mjekët Sabri Hyseni dhe Sabit Mehmeti, të dy të punësuar në Klinikën e Urologjisë.
Lajmi u bë i ditur fillimisht nga gazetari i shëndetësisë, Bujar Vitija, i cili përmes një postimi në Facebook tregoi se konflikti eskaloi në përleshje fizike, pasi njëri nga mjekët akuzoi tjetrin për përfshirjen e një operacioni në një datë të caktuar pa dakordim.
“Një mjek e ka sulmu një koleg të tij në Klinikën e Urologjisë. Gjithçka ka ndodh për një mosmarrëveshje rreth programit të operacioneve. ‘Pse ma ke qit operacionin në filan ditën’ – e ka sha dhe e ka godit me grusht,” ka shkruar Vitija.
Ai shtoi se ky nuk është rasti i parë i përplasjeve fizike mes mjekëve në QKUK dhe kërkoi ndërhyrje urgjente nga menaxhmenti për t’i parandaluar rastet e tilla.
“Meqë këtyre mjekëve s’po ju vjen marre e po rrehen, QKUK ish dashtë me marrë masa një herë e mirë me i parandalu këto raste. Dhuna nuk guxon me qenë e pranishme askund, e aq më pak në një institucion shëndetësor,” u shpreh ai.
Deri në momentin e publikimit të këtij lajmi, QKUK nuk ka dalë me ndonjë reagim zyrtar lidhur me incidentin dhe nuk dihet nëse është iniciuar ndonjë procedurë disiplinore ndaj të përfshirëve.
Theksojmë se raste të ngjashme të shkeljeve të etikës dhe trajtimit të kolegëve në mënyrë të papërshtatshme janë raportuar edhe në klinika të tjera të QKUK-së.
Përkundër akuzave të ngritura nga Prokuroria ndaj drejtorit të Klinikës së Kardiologjisë, Lulzim Kamberi, dhe shefit të Elektrostimulimit dhe Elektrofiziologjisë, Edmond Haliti, për cenim të të drejtave në marrëdhënie pune ndaj kolegut të tyre Imri Jashari, të njëjtit vazhdojnë të ushtrojnë detyrat pa asnjë pengesë./Insajderi
