Një rast i vjedhjes së rëndë është raportuar të ketë ndodhur të enjten në fshatin Soponicë të Kaçanikut, ku persona të panjohur kanë depërtuar me forcë në një shtëpi të pabanuar dhe kanë marrë një armë të regjistruar.
Burimet e Gazetës Sinjali bëjnë me dije se rreth orës 14:30, Policia është njoftuar për rastin nga S.T. rreth 40-vjeçar, i cili ka raportuar se shtëpia e vëllait të tij, N.T – që aktualisht jeton në Zvicër – ishte gjetur e demoluar dhe me një dritare të thyer afër kuzhinës.
Sipas deklarimeve të tij, persona të panjohur kishin depërtuar brenda objektit dhe nga kontrolli fillestar ishte konstatuar se mungonte një pushkë ajrore , të cilën viktima e mbante me leje. Ankuesi ka bërë të ditur se nuk kishte sende të tjera me vlerë në shtëpi.
Pas daljes në vendin e ngjarjes, Policia ka iniciuar rastin si “Vjedhje e rëndë”, me urdhër të Prokurorit të Shtetit. Rasti i kompletuar i është referuar Njësisë së Hetimeve për procedura të mëtejshme.
Hetimet janë në zhvillim.
