Një ngjarje tragjike ka ndodhur të hënën në Gjakovë, ku dy persona kanë humbur jetën në vendin e tyre të punës. Ata kanë rënë nga kati i tretë i një objekti që ishte në ndërtim, duke ndërruar jetë në vend.
Lidhur me këtë rast të rëndë, të martën ka reaguar edhe Avokati i Popullit, duke e cilësuar këtë si një tjetër dëshmi të gjendjes alarmante në fushën e sigurisë dhe shëndetit në punë në Kosovë.
Në reagimin e këtij institucioni thuhet se “këto ngjarje tragjike janë tregues i qartë i gjendjes alarmante që mbizotëron në fushën e sigurisë dhe shëndetit në punë dhe pasojë e mungesës së zbatimit efektiv të standardeve ligjore të përcaktuara për mbrojtjen e jetës dhe dinjitetit të. Këto raste janë tregues se gjendja me respektimin e të drejtave të të punësuarve, në fushën e sigurisë dhe shëndetit në punë, vazhdon të jetë e brishtë”.
Avokati i Popullit ka rikujtuar se ka ngritur vazhdimisht shqetësime për këtë çështje, përmes raporteve dhe rekomandimeve drejtuar institucioneve përgjegjëse.
“Avokati i Popullit, në kuadër të mandatit të tij kushtetues dhe ligjor, në vazhdimësi ka adresuar shqetësimet në lidhje me këtë çështje. Në raportin Ex officio Nr. 252/20211, të publikuar në shkurt 2024, është theksuar se prej vitit 2004 deri më 2021, janë evidentuar 232 vdekje të punëtorëve që kanë humbur jetën në vendin e punës ose si pasojë e kushteve të punës. Përkundër faktit që ky raport ka përfshirë rekomandime të qarta dhe të zbatueshme, autoritetet përgjegjëse nuk kanë ndërmarrë veprime të mjaftueshme për përmirësimin e gjendjes”, thuhet në reagim.
Tutje, ky institucion bën thirrje për veprim të menjëhershëm dhe të koordinuar institucional për parandalimin e aksidenteve të tilla tragjike.
“Avokati i Popullit bashkëndjen me familjet e punëtorëve që kanë humbur jetën në këto aksidente. Avokati i Popullit ua tërheq vëmendjen autoriteteve për përgjegjësinë që kanë për veprim të menjëhershëm dhe të koordinuar në zbatim të detyrimeve lidhur me sigurinë dhe shëndetin në punë. Siç është e domosdoshme që Inspektorati i Punës të përmbush detyrimet ligjore, që përmes kontrollit në terren, veçanërisht në sektorët me rrezik të lartë të ndikoj në parandalim të aksidenteve në punë dhe mbrojtje e siguri”.
Në fund, theksohet edhe nevoja për hetim të plotë dhe përgjegjësi institucionale.
“Në anën tjetër autoritetet përgjegjëse kanë detyrim të veprojnë me qëllim të një hetimi të gjithanshëm, profesional dhe transparent për secilin rast të aksidentit në punë dhe duke vendos përgjegjësi institucionale në ushtrim të kontrollit efektiv në zbatim të masave ligjore për sigurinë dhe shëndetin në punë, si përgjegjësisë së shtetit për respektimin e të drejtës për jetë dhe përgjegjësisë që ka shteti për të garantuar sigurinë dhe shëndetin në vendin e punës”, thuhet ndër të tjera në reagimin e Avokatit të Popullit.
