Një aksident i rëndë trafiku ka ndodhur të premten herët në mëngjes në Wohlen, kantoni Aargau të Zvicrës, duke lënë pas dy viktima të moshës së re dhe një të plagosur rëndë. Ndër të vdekurit është edhe një 16-vjeçar me prejardhje nga Kosova, i cili dyshohet se ka qenë drejtuesi i automjetit.
Sipas Policisë Kantonale të Aargaut, ngjarja ka ndodhur rreth orës 05:00 në një zonë banimi me kufizim shpejtësie prej 30 km/h. Automjeti, një Mercedes, ka dalë nga rruga, është përplasur fillimisht me një pemë në një kopsht privat dhe më pas me murin e një shtëpie. Pas përplasjes, mjeti është përfshirë nga flakët dhe është djegur plotësisht.
Në vendngjarje kanë mbërritur menjëherë ekipet e emergjencës, por 16-vjeçari shqiptar nga Kosova dhe një 19-vjeçar zviceran, që ndodhej në sediljen e parë, janë gjetur pa shenja jete. Një tjetër 19-vjeçar, banor i Cyrihut, që ishte pasagjer në sediljen e pasme, është transportuar me urgjencë në spital dhe ndodhet në gjendje kritike.
Zëdhënësi i policisë, Bernhard Graser, ka deklaruar se automjeti i përkiste vëllait të shoferit 16-vjeçar, dhe se ende nuk është e qartë se si i mituri ka arritur të marrë automjetin në zotërim.
Të dhënat paraprake sugjerojnë se shpejtësia e tejkaluar mund të ketë qenë një faktor kyç në shkaktimin e aksidentit. Autoritetet janë duke hetuar për të rindërtuar kronologjinë e ngjarjes dhe për të përcaktuar saktësisht rrethanat dhe përgjegjësitë e përfshira.
Ngjarja ka tronditur thellë komunitetin lokal, veçanërisht për shkak të moshës së re të viktimave dhe natyrës dramatike të aksidentit. Përplasja fatale dhe humbja e jetëve në rrethana kaq tragjike kanë shkaktuar reagime të shumta në opinionin publik, si në Zvicër, ashtu edhe në mesin e komunitetit shqiptar atje.
Hetimet pritet të vazhdojnë në ditët në vijim për të hedhur më shumë dritë mbi këtë aksident tragjik.
