Bashkimi Demokratik për Integrim (BDI) ka kërkuar dorëheqjen e menjëhershme të zëvendësministrit të Punëve të Brendshme, Astrit Iseni, dhe zëvendësministres për Sport, Safije Sadiki Shaini, për shkak të mosreagimit ndaj thirrjeve me përmbajtje fashiste gjatë ndeshjes së basketbollit ndërmjet Maqedonisë së Veriut dhe Rumanisë.
Javës së kaluar, gjatë kësaj ndeshjeje në sallë janë dëgjuar thirrje si “Shqiptari i mirë është shqiptari i vdekur” dhe “Dhoma e gazit për shqiptarët”, ndërsa mes të pranishmëve ndodheshin edhe krerët më të lartë shtetërorë të Maqedonisë së Veriut, përfshirë kryeministrin Hristijan Mickoski dhe kryetarin e Kumanovës, Maksim Dimitrievski.
Anëtari i kryesisë së BDI-së, Emir Sulejmani, në një konferencë për media të hënën iu bëri thirrje përfaqësuesve shqiptarë në Qeverinë e Maqedonisë që të distancohen publikisht nga ngjarja, të kërkojnë sanksione të rënda dhe të tërhiqen nga një qeveri që toleron urrejtjen.
“Nuk ishte vetëm një incident sportiv, por një shfaqje e tmerrshme e urrejtjes etnike, e toleruar nga krerët më të lartë shtetëror, që ishin të pranishëm në sallë – kryeministri Mickoski, kryetari i Kumanovës Dimitrievski, ministri i Punëve të Brendshme, zëvendëskryeministri dhe shumë funksionarë të tjerë. Në vend që të dëgjonim brohoritje për sport dhe bashkëjetesë, dëgjuam thirrje të tmerrshme si ‘shqiptari i mirë është shqiptari i vdekur’, ‘dhoma e gazit për shqiptarët’, ‘Maqedoni e pastër’. Këto janë parulla që rikujtojnë kapitujt më të errët të historisë evropiane, të cilat nuk mund të relativizohen dhe as të justifikohen si çështje tifozësh. E as të mbulohen me deklarata hipokrite për unitet dhe as me gjoja hetime objektive që në fund përfundojnë me shpërblime. Më e rënda është tolerimi dhe heshtja totale institucionale. Asnjë reagim nga Federata e Basketbollit, Ministria e Punëve të Brendshme, qeveria dhe secili që ishte në atë tribunë të ndotur nga urrejtja”, tha ai.
Ai kritikoi përfaqësuesit shqiptarë në qeverinë maqedonase për, siç tha, për veprim dhe mosreagim përballë një sulmi të rëndë ndaj dinjitetit shqiptar.
“Kërkojmë përgjegjësi politike konkrete: dorëheqje të menjëhershme të Astrit Isenit, zëvendësministër i Punëve të Brendshme, dhe dorëheqje të Safije Sadiki-Shainit, zëvendësministre për Sport, për mosveprim dhe mosreagim përballë një sulmi të rëndë ndaj dinjitetit të qytetarëve shqiptarë dhe bashkëjetesës ndëretnike,” shtoi Sulejmani.
Kundër këtyre thirrjeve kanë reaguar edhe institucionet në Kosovë, ku rasti është dënuar edhe nga presidentja Vjosa Osmani
