Ramush Haradinaj ngushëllon për vdekjen e Greta Kryeziut: Një humbje e madhe për familjen dhe Aleancën
Kryetari i Aleancës për Ardhmërinë e Kosovës, Ramush Haradinaj, ka shprehur ngushëllimet e tij për ndarjen nga jeta të Greta Kryeziut, drejtoreshë e Shëndetësisë në Komunën e Kamenicës dhe aktiviste e AAK-së.
Përmes një postimi në rrjetet sociale, Haradinaj ka thënë se lajmi për vdekjen e saj është pritur me pikëllim të thellë, duke theksuar se Greta ishte një vajzë e përkushtuar, profesioniste e zellshme dhe bashkëpunëtore e çmuar.
“Me pikëllim të thellë mora lajmin për ndarjen nga jeta të koleges sonë në Aleancë, Greta Kryeziu, drejtoreshë e Shëndetësisë në Kamenicë. Një sëmundje e rëndë ia mori jetën brenda pak ditësh, duke lënë dhimbje të madhe te familja, kolegët dhe miqtë,” ka shkruar Haradinaj.
Ai ka kujtuar se Greta ka qenë kandidate për deputete dhe së fundmi për Asamblenë Komunale në Kamenicë, si dëshmi e përkushtimit të saj për shërbim publik dhe ndaj qytetarëve.
“Ngushëllimet më të sinqerta familjes, të afërmve dhe gjithë kolegëve. U prehtë në paqe,” përfundon Haradinaj.
