Një ngjarje e rëndë ka ndodhur sot pasdite në fshatin Smirë të Vitisë, ku një i ri është vetëplagosur me armë zjarri.
Burimet e Sinjalit bëjnë të ditur se rreth orës 15:05, A.F, rreth 21-vjeçar, është plagosur aksidentalisht në këmbë pasi i ka shkrepur revolja të cilën e mbante në brez. Ai ndodhej i vetëm në malet mbi fshatin Smirë, kur arma pa leje i shpërtheu në dorë, duke i shkaktuar lëndime në pjesën e epërme të këmbës së djathtë.
Pas incidentit, një dëshmitar e ka marrë të riun dhe e ka transportuar me kalë, deri në pikën ku është takuar me patrullën policore dhe ekipin e emergjencës. Atij iu dha ndihma e parë në QMF Viti dhe më pas u dërgua në Spitalin e Gjilanit, ku po trajtohet. Sipas mjekëve, ai është jashtë rrezikut për jetë, por duhet të qëndrojë në spital për kujdes të mëtejshëm.
Policia, bashkë me hetuesit, kanë kërkuar armën e përdorur, por nuk arritën ta gjejnë në terren. Megjithatë, gjatë ekzaminimeve mjekësore, nën pantallonat e të riut u gjet një pjesë e thyer e armës, kafka, e cila është konfiskuar. Dyshohet se arma ishte një revole Glock 9 mm, ngjyrë hiri.
Lidhur me rastin është njoftuar Prokurorja e Krimeve të Rënda, ndërsa hetimet janë duke vazhduar për zbardhjen e plotë të rrethanave./Sinjali
