Pasi kryeparlamentari Dimal Basha, ka kërkuar falje për artikullin anti-UÇK, ku figuron si bashkautor, për arsyetim pati se i është kërkuar të ishte pjesë e një teme tjetër, dhe jo në shkrimin kundër UÇK-së.
Ndërsa organizatat e dala nga lufta, reaguan duke thënë se kërkim-falja e Bashës nuk mjafton, duke kërkuar po ashtu shkarkimin e tij të menjëhershëm, transmeton Klankosova.tv.
Rafet Llapashtica, nga OVL e UÇK-së, në emisionin “Kosova Today” në Klan Kosova, tha se punimi shkencor i Bashës është ditur qysh më herët.
Llapashtica, ndër të tjera tregoi disa nga arsyet pse nuk e pranojnë kërkim-faljen e kryetarit të Kuvendit.
“Dimal Basha e ka ditur që është bashkautor, dhe e ka ditur edhe në vitin 2012. Është me rëndësi që kjo të dihet. Këtë çështje është dashur ta thonë deputetët aty, jo ne. Dimal Basha këtë libër, dekodim i krimit të organizuar shqiptar, e ka në shtëpi te veten. Dimal Basha ka qenë në promovim të librit. Dimal Basha ka kërkuar njerëz që ta ndihmojnë një maqedonaseje”, thotë ai.
Në ndërkohë, Llapashtica deklaroi se “Dimal Basha nuk i vyen as atij që e ka propozuar, e këtyre që kanë votuar”.
Ndërsa sipas tij, Basha me deklarimin e tij të së hënës, ku kërkoi falje për artikullin, tha se ai gënjeu qytetarin.
“E ka rrejt qytetarin, e ka rrejt edhe propozuesin e vet, partinë fituese, po personalisht mua nuk më rren. Se çka shkruhet për UÇK-në unë e lexoj. Në këtë libër ky nuk e ka fy vetëm Ushtrinë Çlirimtare të Kosovës. Ky libër në universitetin e Beogradit është temë studimi, ku studentët diplomojnë me këtë libër”, tha ai.
