Në prag të zgjedhjeve lokale që do të mbahen më 12 tetor, profesori i njohur nga Llapi, Xhevat Kapiti, ka bërë një thirrje të fuqishme për qytetarët që të jenë të kujdesshëm në zgjedhjen e përfaqësuesve për Asamblenë Komunale.
Sipas tij, vota për një kandidat të papërgatitur apo të nënshtruar ndaj interesave të ngushta partiake është një dëm afatgjatë për komunën dhe qytetarët.
“Një asambleist i dobët nuk është vetëm një ulëse e humbur në Kuvendin Komunal. Ai është një pengesë për zhvillim, një zë i heshtur nga padituria kur duhet të ngriten çështjet në interes të qytetarëve, është një i nënshtruar ndaj liderit dhe partisë në kurriz të interesit të përgjithshëm qytetar,” ka shkruar Kapiti.
Ai thekson se pasojat e zgjedhjeve të gabuara politike reflektojnë drejtpërdrejt në fusha jetike si:
???? arsimi,
???? shëndetësia,
???? infrastruktura,
???? bujqësia,
???? mirëqenia sociale, dhe më gjerë.
Gjithashtu, ai paralajmëron se toleranca ndaj kandidatëve të dobët vetëm për arsye miqësore apo familjare sjell pasoja që ndikojnë në të ardhmen e fëmijëve tanë dhe në cilësinë e jetës në komunë.
“Vota nuk është dhuratë, por është kontratë,” thekson ai, duke shtuar se qytetarët duhet të votojnë individë që kanë dije, guxim dhe vizion për të përfaqësuar dinjitetshëm.
Në përfundim, profesori Kapiti u bën thirrje qytetarëve të Llapit dhe më gjerë që të mos e keqpërdorin të drejtën e votës, pasi çdo votë e dhënë gabimisht është një gur në dobësimin e shoqërisë.
