Komuna e Podujevës ka vazhduar me shpërndarjen e subvencioneve për fermerët lokalë, si pjesë e politikave për zhvillimin e bujqësisë dhe ekonomisë lokale. Sot, 23 blegtorë kanë përfituar makina mjelëse për dy lopë, duke rritur kështu efikasitetin dhe cilësinë e prodhimit të qumështit në fermat e tyre.
Kryetari i Komunës, Shpejtim Bulliqi, gjatë shpërndarjes së këtyre subvencioneve theksoi rëndësinë që ka mbështetja institucionale për bujqit dhe blegtorët e komunës.
“Si institucione komunale do të vazhdojmë t’i mbështesim fermerët tanë. Këto subvencione jo vetëm që ua lehtësojnë punën, por ndihmojnë në rritjen e kapaciteteve të tyre prodhuese dhe ndikojnë pozitivisht në zhvillimin ekonomik lokal,” tha Kryetari Bulliqi.
Përfituesit e këtyre pajisjeve janë përzgjedhur në bazë të kritereve të përcaktuara nga Drejtoria për Bujqësi dhe Zhvillim Rural, me qëllim që ndihma të shkojë tek ata fermerë që realisht e kanë të nevojshme dhe që kontribuojnë në ekonominë rurale të komunës.
Komuna e Podujevës mbetet e përkushtuar në mbështetjen e bujqësisë si një ndër sektorët kryesorë për zhvillim të qëndrueshëm ekonomik dhe mirëqenie të banorëve të saj.
