Hasan Ajeti, i cili mban pozitat e ud.drejtorit të Departamentit për Burime Njerëzore në SHSKUK dhe ud.Shefit të Personelit në QKUK, është kandidati i vetëm që e kaloi testin me shkrim për pozitën e Shefit të Personelit në QKUK.
Shërbimi Spitalor Klinik dhe Universitar i Kosovës i ka publikuar rezultatet e testit me shkrim të konkursit për pozitën e Shefit të Personelit në QKUK.
Kandidati i vetëm që e ka kaluar këtë test është Hasan Ajeti. Ai e ka kaluar testin me shkrim me 57.5 pikë. Një kandidatë tjetër nuk e ka kaluar testin, ndërsa dy të tjerë nuk kanë hyrë fare në test, shkruan Gazeta Shneta.
Ajeti aktualisht mban dy pozita, njërën në SHSKUK e tjetrën në QKUK. Në SHSKUK është drejtor e në QKUK është Shef. Në të dy këto pozita është emëruar nga drejtori i përgjithshëm i SHSKUK-së Elvir Azizi.
Në SHSKUK është ud.drejtor i Departamentit të Burimeve Njerëzore. Pjesë e këtij departamenti është Divizioni për Rekrutim, i cili e ka shpallur konkursin ku Ajeti e ka kaluar testin me shkrim.
Ndërkaq në QKUK e mban pozitën e ud.Shefit të Personelit, pozitë kjo për të cilën Ajeti tanimë e ka kaluar testin me shkrim dhe është rrugës për të marr pozitën.
