Kryeministri në detyrë Albin Kurti, ka pritur në takim koordinatorin e ri për Zhvillim të Kombeve të Bashkuara në Kosovë, Stephen O’Malley.
Në njoftimin qeveritar thuhet se kryeministri e ka vlerësuar lart bashkëpunimin e vazhdueshëm me ekipin e OKB-së në Kosovë, si partner të besueshëm në forcimin e qeverisjes dhe zhvillimin e qëndrueshëm.
“Gjatë takimit u theksuan disa prej bashkëpunimeve më të suksesshme në luftën kundër korrupsionit, edukimin e hershëm, trashëgiminë kulturore e banimin social. U ritheksua gatishmëria e qeverisë për të thelluar partneritetin me UNKT në drejtim të: zhvillimit të kapitalit njerëzor përmes arsimit gjithëpërfshirës, shëndetësisë cilësore, mbrojtjes sociale, sundimit të ligjit e qeverisjes së mirë”, bëhet e ditur në njoftim.
Kurti thuhet ta ketë shprehur bindjen se udhëheqja e O’Malley do ta avancojë partneritetin ekzistues në një nivel edhe më të lartë gjatë ciklit të ri të planifikimit 2026–2030. “Duke u bazuar në parimet e përbashkëta të gjithëpërfshirjes, barazisë gjinore dhe të drejtave të njeriut”, përfundon njoftimi i qeverisë.
