Sot në Podujevë u përkujtua 27-vjetori i Betejës së Kaçandollit. Në ceremoninë përkujtimore morën pjesë komandantë të Ushtrisë Çlirimtare të Kosovës, përfaqësues të ekzekutivit komunal, shoqata të dala nga lufta, familjarë të dëshmorëve dhe qytetarë të shumtë.
Kryetari Shpejtim Bulliqi tha se Beteja e Kaçandollit mbetet një prej dëshmive më të fuqishme të vendosmërisë për liri, duke theksuar sakrificën sublime të ushtarëve të UÇK-së që zgjodhën lirinë para jetës së robëruar.
Beteja e zhvilluar më 15, 16 dhe 17 shtator shënoi rënien heroike të shtatë dëshmorëve të UÇK-së: Bekim Maliqi, Bekim Lushaku, Nazmi Zhegrova, Fadil Sejdiu, Habib Zeka, Islam Rekaliu dhe Selim Rekaliu.
Në fund të ceremonisë u bë homazh dhe u vendosën lule pranë lapidarit në nderim të dëshmorëve të Betejës së Kaçandollit dhe të gjithë dëshmorëve të kombit.
