Zhduket një 15-vjeçare, policia nis kërkimet

Një rast shqetësues është raportuar në Ferizaj, ku një vajzë 15-vjeçare është shpallur person i zhdukur, pasi ka dalë nga shtëpia të dielën pasdite dhe nuk është kthyer më.

Sipas informatave zyrtare, më 13 tetor 2025 rreth orës 02:30, në Stacionin Policor Ferizaj është paraqitur F. Jashari, i cili ka raportuar zhdukjen e vajzës së tij, E.J., 15-vjeçare

Ai ka deklaruar se vajza ishte parë për herë të fundit më 12 tetor 2025, rreth orës 14:00, para banesës në rrugën “Astrit Bytyqi” në Ferizaj, dhe që nga ajo kohë nuk ka pasur më asnjë kontakt me të.

Sipas përshkrimit të dhënë nga familja, E. J. është e gjatë rreth 160 cm, peshon 60 kg, ka flokë të shkurtër të kafte, dhe në momentin e zhdukjes kishte veshur pantallona farmerka dhe një xhaketë të zezë.

Në lidhje me rastin janë njoftuar hetimet rajonale, si dhe Prokurori Kujdestar për të Mitur, i cili ka urdhëruar inicimin e rastit si “Person i zhdukur”.

Policia e Kosovës ka nisur kërkimet intensive për gjetjen e vajzës, ndërsa rasti po hetohet nga Njësia Rajonale e Hetimeve në Ferizaj.