Ndryshe prej vitit të kaluar që nikoqir ishte Faton Peci, këtë herë Presidentja Vjosa Osmani e ka organizuar Darkën e Lamës, traditë e trashëguar nga Presidenti Historik, Ibrahim Rugova, raporton Periskopi.
Larg syve mediave, ky organizim u mbajt të hënën në mbrëmje në një nga restorantet në Bërnicë.
Pavarësisht insistimit të Periskopit për ta konfirmuar një gjë të tillë nga Presidenca, por nga këta të fundit nuk kanë dhënë asnjë përgjigje.
Megjithatë, fotografi e video nga përgatitjet për këtë organizim ka publikuar restoranti ku edhe u mbajt kjo darkë.
Gjatë fjalimit që Vjosa Osmani mbajti mbrëmë tha se çdo prodhim i vendit është hap e pavarësisë ekonomike.
“Çdo rendiment, cdo fermë, cdo prodhim bio, që mbërrin në tregun tonë, është një hap drejt pavarësisë sonë ekonomike. Sot produktet bio nuk janë vetëm krenari e shtetit tonë, por një standard që po fiton, gjithnjë e më shumë hapësirë, e gjithnjë e më shumë respekt në tregjet e tjera nëpër botë…”, tha ndër të tjera Osmani mbrëmë në Darkën e Lamës.
Ndryshe, Darka që njihet si e “sofrës”, këtë herë Osmani ndyrshoi, duke darkuar në tavolinë.
Darka e Lamës është festë tradicionale shqiptare dhe ndryshe njihet edhe si “Darka e bereqetit”. Zakonisht, mbahet në fund të muajit tetor kur vjelën punët verore.
Kjo festë e moçme tradicionale u rikthye në skenë nga ish-presidenti Ibrahim Rugova në vitin 2002.
Njihet si e lamës, sepse “lama” ka qenë vendi i rrafshët në fshatra malore, ku janë shirë të korrat, kryesisht të misrit. Ndërsa në fushë ka marrë emrin “darka e fushës”, pasi janë vjelë të mirat e saj.
Zakonisht përveç politikanëve vendorë, në organizimin tradicional fotohen edhe zyrtarë të ambasadave, KFOR-it e intelektualë të tjerë.
Darka e lamës organizohet nën patronatin e Presidentit të shtetit dhe mbledhë figurat më eminente të politikës./Periskopi/
