Ish-kryeshefi ekzekutiv i Sekretariatit të Komisionit Qendror të Zgjedhjeve, Burim Ahmetaj, ka publikuar të dhëna të detajuara mbi ndarjen e mandateve nëpër komuna pas zgjedhjeve lokale të 12 tetorit.
Sipas analizës së tij, Partia Demokratike e Kosovës (PDK) ka dalë forca më e votuar në nivel lokal, duke siguruar 187,494 vota dhe 206 mandate në asambletë komunale.
Në vendin e dytë renditet Lidhja Demokratike e Kosovës (LDK), me 183,164 vota dhe 202 mandate, duke pasur një garë shumë të ngushtë me PDK-në.
Lëvizja Vetëvendosje (VV) është pozicionuar e treta me 168,592 vota dhe 178 mandate, ndërsa Aleanca për Ardhmërinë e Kosovës (AAK) ka marrë 87,355 vota dhe 99 mandate.
Në mesin e partive të tjera, Lista Serbe ka siguruar 40,719 vota dhe 118 mandate, Nisma Socialdemokrate ka marrë 20,805 vota dhe 24 mandate, ndërsa GUXO ka përfituar 10,977 vota dhe 8 mandate.
Ahmetaj ka theksuar se kjo analizë ofron një pasqyrë të qartë mbi performancën elektorale të partive politike dhe përfaqësimin e tyre në asambletë komunale në të gjithë vendin.
