Grushtet ua dha në klasë, e edhe gojën tentoi t’ua mbajë të mbyllur brenda saj.
Për ta fshehur këtë akt të 21 tetorit në shkollën “Shaban Shala” në Podujevë, mësimdhënësja dyshohet se edhe i la të mbyllur brenda një dhome arsimore për një kohë, raporton Klan Kosova.
Tmerrin e përjetuar nga fëmijët, prindërit ia rrëfyen Klanit veç në kushte anonime, me arsyetimin e frikës së hakmarrjes.
Pasojat e përjetimeve të nxënësve, të cilëve mësimdhënësja e dyshuar as nuk ju jepte mësim, çuan në zbulimin e rastit nga prindërit.
Për tmerrin që përjetuan fëmijët e pranojnë në shkollë, por nuk japin asnjë detaj më shumë.
Veçse rasti nuk u hesht më, e prindërit tashmë kanë lajmëruar organet e rendit ku edhe kanë dhënë deklaratat e tyre, pas së cilave edhe u morën masat e para për mësimdhënësen.
Klan Kosova ka tentuar që të marrë edhe versionin e mësimdhënëses së dyshuar, por e njëjta nuk është përgjigjur në shkrimet e televizionit.
Për veprimet e ndërmarra nuk kanë dhënë informacione as në Polici e as në Prokurori, ku tashmë ka shkuar rasti. /Klankosova.tv
