Deputeti Besnik Tahiri ka reaguar ashpër ndaj mënyrës se si, sipas tij, qeveria ka menaxhuar situatat e fundit të emergjencës në vend, duke e cilësuar reagimin institucional si të vonuar, të paorganizuar dhe të papërgjegjshëm ndaj qytetarëve.
Tahiri deklaroi se për pesë vite me radhë qeveria ka vepruar sikur Kosova të mos përballej me kriza, duke relativizuar çdo alarm dhe duke shtyrë përgjegjësitë. “Qytetari është parë vetëm si numër votash, jo si hall real,” theksoi ai.
Sipas tij, kjo qasje po bëhet e dukshme tani, në një kohë kur gjysma e vendit po përballet me vërshime. Tahiri kritikoi ashpër mungesën e reagimit serioz institucional, duke thënë se “rehatia e rezultatit elektoral ka marrë përparësi ndaj jetës, pronës dhe dinjitetit të njerëzve”.
Ai përmendi gjithashtu zjarrin që përfshiu një nga bizneset më të mëdha në Gjakovë, për të cilin, sipas Tahirit, nuk pati asnjë reagim institucional. “As prani, as përgjegjësi, as fjalë. Propaganda i ka verbuar institucionet dhe është shndërruar në mllef ndaj qytetarëve,” u shpreh ai.
Tahiri kritikoi mungesën e ngritjes së një task-force kombëtare që do të përfshinte institucionet qendrore, ato lokale dhe kapacitetet teknike private, duke thënë se po përsëritet një skenar i njohur: pritje, vonesa dhe reagim vetëm pasi dëmet bëhen të pakthyeshme.
“Kjo është një fatkeqësi natyrore, por edhe një dështim institucional. Mungesa e koordinimit dhe reagimi i vonuar janë përgjegjësi direkte e shtetit,” deklaroi Tahiri, duke shtuar se qytetarët janë lënë vetëm dhe se komunat po trajtohen me logjikë elektorale.
Në përfundim, ai kërkoi shpalljen e emergjencës kombëtare dhe veprim të menjëhershëm, sidomos në kushtet e uljes së temperaturave dhe qindra familjeve të mbetura pa strehë. “Mos flini më. Zgjedhjet kanë përfunduar. Është koha të veproni,” përfundoi Tahiri.
