Seanca gjyqësore për ish- kryeshefin e KEK-ut, ka vazhduar me fjalën e rastit nga prokurorja e çështjes, Fikrije Zejnullahu, e cila para gjykatës shpalosi qëndrimin e prokurorisë lidhur me akuzat ndaj të pandehurve.
“Konsideroj se pas administrimit të tyre do të arrihet zbardhja e plotë e gjendjes faktike dhe, rrjedhimisht, edhe fajësia e të akuzuarve. Për shkak të shpjegimit të disa prej provave, e kam parë të arsyeshme t’i paraqes në pika të shkurtra, me qëllim që të jenë më të lehta për t’u kuptuar”, ka deklaruar prokurorja e rastit, transmeton IndeksOnline.
Ajo theksoi se prokuroria ka siguruar prova se Nagip Krasniqi, në cilësinë e kryeshefit ekzekutiv, në bashkëkryerje me Imer Dragushën, kanë keqpërdorur detyrën zyrtare. “Prokuroria ka siguruar prova se Nagip Krasniqi, si kryeshef, në bashkëkryerje me Imer Dragushën, kanë keqpërdorur detyrën zyrtare, ndërsa Dragusha tashmë e ka pranuar fajësinë. Prokuroria ka prezantuar në gjykatë prova materiale dhe jomateriale”, tha Zejnullahu.
Sipas saj, prokuroria e konsideron të domosdoshëm edhe administrimin e bisedave përkatëse. “Prokuroria konsideron se duhet të administrohen bisedat e tij. Nuk do të zgjatem me emra, por faktet shihen qartë për ndikimin që është ushtruar për lidhjen e kësaj kontrate. Do të vërtetohet se me dijeni të plotë ka urdhëruar lidhjen e një kontrate”, u shpreh ajo.
Prokurorja shtoi se bëhet fjalë për një kontratë për të cilën do të dëshmojnë edhe dëshmitarë që kanë qenë aktorë të drejtpërdrejtë në proces.
“Një operator ekonomik ishte shpallur i papërgjegjshëm, por pas një periudhe të caktuar është ftuar nga i akuzuari dhe me të njëjtin operator janë ndryshuar të gjitha kushtet e veçanta”, deklaroi ndërkaq gjatë seancës Zejnullahu. Në fund, ajo theksoi se nga këto veprime “Qeverisë së Kosovës i është shkaktuar dëm në vlerë prej 37 milionë euro”.
