Përfaqësues të Stacionit Policor në Podujevë sot prezantuan raportin vjetor (2025) të punës së këtij institucioni dhe ndan mirënjohjeve për zyrtarët policorë të dalluar dhe qytetarët bashkëpunues.
Në këtë aktivitet që u mbajt në sallën e Kuvendit Komunal të Podujevës, Komandanti i Stacionit Policor në Podujevë, Bashkim Bajrami, gjatë prezantimit të raportit theksoi angazhimin e vazhdueshëm të zyrtarëve policorë në ruajtjen e rendit dhe sigurisë publike, parandalimin dhe luftimin e kriminalitetit, si dhe forcimin e bashkëpunimit me komunitetin dhe institucionet lokale.
“Gjatë vitit 2025, Stacioni Policor në Podujevë ka vepruar me profesionalizëm, përgjegjësi dhe respekt të plotë ndaj ligjit dhe të drejtave të qytetarëve. Rezultatet e arritura janë dëshmi e përkushtimit të zyrtarëve tanë dhe e bashkëpunimit të mirë me qytetarët dhe institucionet partnere”, theksoi ndër të tjera komandanti Bajrami.
vjetor duke
Fjalë rasti mbajti edhe Nënkoloneli Basri Shabani, i cili përgëzoi zyrtarët policorë të Stacionit në Podujevë dhe udhëheqjen për punën e bërë gjatë vitit.
Në emër të Komunës së Podujevës, një fjalë rasti mbajti Drejtori i Drejtorisë së Shërbimeve Publike, Bahri Selimi, i cili falënderoi zyrtarët e Stacionit Policor në Podujevë dhe Komandantin për bashkëpunimin e mirë institucional dhe për angazhimin e tyre në garantimin e sigurisë publike. Ai theksoi se Komuna e Podujevës do të vazhdojë të mbështesë iniciativat dhe bashkëpunimin me Policinë e Kosovës në funksion të një ambienti më të sigurt për qytetarët.
Në fund të ceremonisë, u ndanë falënderime për qytetarët bashkëpunues, të cilët me angazhimin dhe gatishmërinë e tyre kanë kontribuar në rritjen e sigurisë në komunitet, si dhe mirënjohje për zyrtarët policorë të dalluar, për përkushtimin, profesionalizmin dhe rezultatet e arritura gjatë vitit 2025.
Në këtë takim morën pjesë edhe Drejtori Komunal i Arsimit, Avni Fetahu, përfaqësues të Këshillit të Bashkësisë Islame në Podujevë, përfaqësues të KFOR-it, përfaqësues të organizatave, të Shërbimit të Zjarrfikësve, si dhe përfaqësues nga Kisha Protestante.
