Sot, me rastin e 29-vjetorit të rënies heroike të Zahir Pajazitit, Hakif Zejnullahut dhe Edmond Hoxhës, u zhvilluan homazhe përkujtimore në nderim të jetës dhe veprës së tyre. Në këto aktivitete morën pjesë Kryeministri i Republikës së Kosovës, Albin Kurti, Ministri i Mbrojtjes, Ejup Maqedonci, nënkryetari Fahri Restelica, si dhe përfaqësues të tjerë institucionalë e bashkëpunëtorë.
Homazhet nisën në Kompleksin Memorial “Zahir Pajaziti” në Orllan dhe vazhduan në Kompleksin Memorial “Baza e Parë e UÇK-së” në Lladoc, ku u vendosën lule të freskëta në shenjë respekti dhe mirënjohjeje për sakrificën e heronjve.
Më pas, delegacioni u ndal edhe në Podujevë, pranë shtatoreve të heronjve, për të nderuar kontributin e tyre të jashtëzakonshëm në luftën për liri dhe pavarësi. Këto homazhe shërbyen si moment reflektimi dhe kujtese për sakrificën sublime që u bë për të ardhmen e vendit.
Sakrifica e Zahirit, Hakifit dhe Edmondit mbetet pjesë e pandashme e historisë sonë kombëtare dhe udhërrëfyes i përhershëm për brezat që vijnë.
Lavdi Zahirit, Hakifit dhe Edmondit!
Lavdi heronjve dhe dëshmorëve të kombit!
