Një aksident tragjik trafiku ka ndodhur sot në orët e hershme të mëngjesit në rrugën nacionale Prishtinë–Pejë, në fshatin Korroticë, ku si pasojë e vetaksidentit ka humbur jetën një e re.
Ngjarja është raportuar mëngjesin e sotëm, rreth orës 06:50, ndërsa menjëherë pas pranimit të informatës janë angazhuar ekipet patrulluese si dhe njësia për hetimin e aksidenteve.
Sipas të dhënave fillestare, në aksident është përfshirë një veturë e tipit BMW me tabela të Republikës së Shqipërisë, në të cilën ndodheshin dy persona.
Drejtues i automjetit ishte B.L., rreth 35-vjeçar, i cili ka pësuar lëndime trupore dhe aktualisht është duke u trajtuar në QKMF Bresje.
Ndërsa pasagjerja, Arbiana Shtylla, rreth 27-vjeçare, është transportuar me urgjencë nga ekipet emergjente, por fatkeqësisht është konstatuar vdekja e saj në QKUK.
Lidhur me rastin është njoftuar Prokurori i Shtetit, i cili ka dalë në vendin e ngjarjes për t’i mbikëqyrur veprimet hetimore. Po ashtu në lokacion kanë dalë edhe njësitë e zjarrfikësve, si dhe kompania për mirëmbajtjen e rrugëve.
Me urdhër të Prokurorit kujdestar, trupi i pajetë i viktimës është dërguar në Institutin e Mjekësisë Ligjore për autopsi, ndërsa drejtuesi i veturës, pas përfundimit të tretmanit mjekësor, do të intervistohet nga hetuesit e NJKA-së.
Rrethanat e këtij vetaksidenti fatal janë duke u hetuar, ndërsa autoritetet kanë paralajmëruar se informata shtesë do të bëhen publike pas kompletimit të raportit zyrtar.
