Në qytetin e Manchester, në ambientet e Manchester School of Art, është hapur ekspozita “KFOR and Kosovo +25”, një ngjarje me rëndësi të veçantë historike dhe emocionale për Kosovën.
Kryetari i Komunës së Podujevës, Shpejtim Bulliqi, mori pjesë në ceremoninë e hapjes, si dhe në panelin e diskutimit të organizuar në kuadër të kësaj ekspozite, ku u ndanë reflektime mbi rrugëtimin e Kosovës drejt lirisë dhe rëndësinë e ruajtjes së kujtesës historike.
Ekspozita rikthen vëmendjen te viti 1999, duke sjellë fotografi dhe dëshmi nga periudha e pasluftës. Një pjesë e konsiderueshme e fotografive janë realizuar në Podujevë, duke dokumentuar momentet e para të lirisë dhe ringritjen e qytetit pas shkatërrimeve të luftës.
Gjatë diskutimit, u theksua roli vendimtar i ndërhyrjes së NATO-s dhe misionit të KFOR-it në vendosjen e paqes dhe sigurisë në Kosovë, si dhe u nderuan dëshmorët dhe të gjithë ata që kontribuan për lirinë e vendit.
Pas 25 vitesh, Podujeva qëndron si simbol i qëndrueshmërisë dhe besimit në të ardhmen, duke vazhduar rrugën e zhvillimit dhe forcimit të miqësisë me aleatët ndërkombëtarë.
