Kryetari Shpejtim Bulliqi: Miratohet projekti 35 milionë euro për trajtimin e ujërave të zeza në Podujevë
Kryetari i Komunës së Podujevës, Shpejtim Bulliqi, ka njoftuar se Kuvendi i Republikës së Kosovës ka miratuar Projektligjin nr. 10/L-014 për ratifikimin e Marrëveshjes së Kredisë ndërmjet Republikës së Kosovës dhe Banka Evropiane për Rindërtim dhe Zhvillim, për realizimin e projektit “Impianti për Trajtimin e Ujërave të Zeza në Podujevë”.
Sipas tij, projekti kap vlerën prej 35 milionë eurosh, ku 25 milionë janë kredi nga Banka Evropiane për Rindërtim dhe Zhvillim, ndërsa 10 milionë euro sigurohen nga Korniza Investive e Bashkimit Evropian.
“Ky projekt do të ndikojë drejtpërdrejt në trajtimin e ujërave të zeza në Komunën e Podujevës, si dhe do të ketë impakt të rëndësishëm në mbrojtjen e mjedisit dhe pastrimin e lumenjve, ku aktualisht derdhen këto ujëra,” ka theksuar Bulliqi.
Ai ka falënderuar Kryeministrin Albin Kurti për prioritizimin e këtij projekti, si dhe deputetët e Kuvendit që votuan pro, duke i hapur rrugë realizimit të një investimi jetik për qytetarët e Podujevës.
