Deputeti Besnik Tahiri ka votuar në favor të Ligjit për organizimin e Lojërat Mesdhetare 2030, duke theksuar rëndësinë e shpërndarjes së drejtë të investimeve infrastrukturore në komunat e përfshira.
Gjatë fjalës së tij, Tahiri u shpreh se disa komuna do të kenë rol të rëndësishëm në organizimin e këtyre lojërave, por nënvizoi se Podujevë duhet të jetë përfituese kryesore e investimeve.
“Janë disa komuna të cilat do të kenë rol në këtë garë, në këto lojëra. Unë mendoj se investimi më i madh duhet të shkojë në Podujevë,” deklaroi ai.
Sipas Tahirit, arsyeja kryesore lidhet me traditën sportive që ka kjo komunë, veçanërisht në futboll, si dhe me pozitën e saj gjeografike si zonë ndërkufitare.
Ai shtoi se investimet në infrastrukturë në këtë zonë do të kenë ndikim të madh zhvillimor, duke përmendur afërsinë me Prishtinë dhe lidhjen e mirë me autostradën, çka e bën Podujevën një pikë strategjike për zhvillimin e aktiviteteve sportive dhe ekonomike.
Në fund të fjalës së tij, Tahiri i uroi suksese organizatorëve të lojërave, duke theksuar përgjegjësinë e madhe që qëndron përpara tyre.
