Komuna e Podujevës ka njoftuar organizimin e një diskutimi publik lidhur me Profilin dhe Vlerësimin e Gjendjes Ekzistuese të Draft Planit Zhvillimor Komunal (PZHK), duke ftuar qytetarët dhe të gjitha palët e interesuara të japin kontributin e tyre në këtë proces të rëndësishëm.
Sipas njoftimit, ky aktivitet organizohet në përputhje me Ligjin Nr. 04/L-174 për Planifikimin Hapësinor dhe Udhëzimin Administrativ Nr. 05/2014, të cilat rregullojnë pjesëmarrjen e publikut në planifikimin hapësinor.
Dokumenti në fjalë përbën një pjesë kyçe të Draft Planit Zhvillimor Komunal dhe synon të analizojë gjendjen aktuale si dhe të vlerësojë ndikimet mjedisore që mund të rrjedhin nga zbatimi i tij në të ardhmen.
Detajet e diskutimit publik:
- Data: 30 prill 2026
- Ora: 10:00
- Vendi: Salla e Kuvendit Komunal
Qytetarët dhe grupet e interesit do të kenë mundësi të paraqesin komentet dhe sugjerimet e tyre në disa forma:
- Drejtpërdrejt gjatë diskutimit publik
- Me shkrim në zyrat e komunës
- Përmes emailit: infopodujeva@rks-gov.net
Qëllimi i këtij diskutimi është të rrisë transparencën në vendimmarrje, të sigurojë përfshirje sa më të gjerë qytetare dhe të garantojë që zhvillimi i ardhshëm i komunës të jetë në përputhje me nevojat e komunitetit dhe standardet e mbrojtjes së mjedisit.
Nga Komuna bëhet thirrje për pjesëmarrje sa më të madhe, duke theksuar rëndësinë e kontributit qytetar në ndërtimin e një zhvillimi të qëndrueshëm për Podujevën.
