Kryetari i Skenderajt, Sami Lushtaku ka njoftuar se ka ushtruar padi ndaj kryeministrit në detyre të Kosovës, Albin Kurti pas deklaratave të tij të fundit.
Gazetari Vullnet Krasniqi i ftuar në emisionin ‘Kosova Today’ tha se akterët politik po përdorin çështjen e luftës për përfitime elektorale, teksa u ndal të komentoi edhe padinë e Lushtakut ndaj Kurtit.
“Jemi në një fazë ku fushata zgjedhore, ku është një betejë politike e njerëzve në pushtet dhe atyre që dojnë të marrin pushtetin. Por, problemi qëndron te përfshirja e luftës së UÇK-së ose disa figurave që janë trashëgimi e politikes dhe shoqërisë për të përfituar politikisht në vota. Përdorimin e sentimentit të luftës për të fituar vota, edhe beteja e zhvilluar mes Kurtit dhe Lushtakut e ka këtë qëllim e ka me bartë betejën dhe me përfitu tek lufta me bartë betejën me prek sentimentin e luftës, do thotë që nuk ka ndonjë substancë. Padia e Lushtakut me sa mbajë mend unë është e para e një politikani që padit një politikan tjetër”, tha ai.
Në anën tjetër panelistja, Elena Uka tha se veprimi i Lushtakut është për t’u përgëzuar pasi ky veprim thotë ajo ‘do të na bie ne në një tjetër nivel të emancipimit se fjala publike duhet të ketë përgjegjësi’.
“Lushtakun e përgëzoi për këtë padi, mendoj që ka vepruar në mënyrë shumë të mençur, pasi përpara këto gjëra i kanë lënë të shkojnë në harresë, gjërat që janë thënë, akuzat, dyshimet dhe mendoj që kjo do të na bie ne në një tjetër nivel të emancipimit se fjala publike duhet të ketë përgjegjësi, fjala publike ka pasoja”, tha Uka.
Gazetari Shkumbin Kajtazi tha se ‘Lushtaku bëhet problem vetëm në kohën e zgjedhjeve’ duke përmendur edhe ish-deputetët e LVV-së që kishin diskutime me kryetarin e Skenderajt.
“Nëse ne e kishim pas një qëllim me fol për program dhe me fol për diçka që i nevojitet qytetarëve këto 4 vitet e ardhshme ish kanë krejt në rregull. Mirëpo tash kujt i konvenon ky diskutim? Unë mendoj që më shumë se ata që kanë qenë në UÇK, ky diskutim i konvenon Albin Kurtit. Sami Lushtaku bëhet problem për Adriana Matoshin dhe për të tjerët vetëm para zgjedhjeve”, tha Kajtazi.
