Kreu i Aleancës, Ardian Gjini, ka thënë se thirrja e seancës konstituive për datën 9 shtator, është shkelje brutale e Kushtetutës.
Deklarimet, Gjini i bëri në një konferencë për media, raporton IndeksOnline.
Përpara të pranishmëve, kryetari i Aleancës shtoi se do të mblidhet me grupin parlamentar të partisë, për të marrë vendim nëse do të marrin pjesë ose jo në këtë seancë.
Ai ka thënë se Kosova po përballet prej kohësh me një krizë institucionale, ndërsa ka akuzuar pushtetin për, siç është shprehur, uzurpim të institucioneve dhe shkelje të njëpasnjëshme kushtetuese.
“Fatkeqësisht, politika e Kosovës nuk po produkton lajme të mira fare që një kohë shumë të gjatë. Po bëhen dy vite prej se Kosova është në krizë institucionale të qëllimshme. Ajo që e kemi parë sot, që do të thotë thirrja e seancës me datën 9 shtator, është edhe një shkelje brutale, enorme edhe e bindjes kushtetuese po e vetë Kushtetutës edhe më herët. Kjo është një mënyrë me u tallë me shtetin, me u tallë me qytetarët, është një mënyrë me abuzuar skajshëm me gjithçka që shteti i ofron dikujt që i fiton zgjedhjet, e ajo është me qeverisë”, tha Gjini.
Gjini ka kërkuar nga LDK dhe PDK që të mos bëhen pjesë e një procesi të tillë dhe të mos e legjitimojnë, sipas tij, shkeljen kushtetuese të shkaktuar nga Lëvizja Vetëvendosje.
“LDK dhe PDK të mos bëhen pjesë e kësaj shkeljeje brutale të Kushtetutës nga VV”, ka deklaruar Gjini.
Ai deklaroi se do të jetë pranë qytetarëve, për të dëgjuar hallet e tyre.
“Pavarësisht se kur kanë me u mbajt zgjedhjet, unë kam me iu premtu juve dhe qytetarëve të Kosovës se për çdo ditë kam me qenë me ta, me fol dhe me iu dëgju. Nuk muj me duru me ju pa kështu. Për çdo ditë kam me dalë e me i taku qytetarët, sado që të marrë kohë. Nuk kemi me u ndalë” deklaroi Gjini.
Ai shtoi po ashtu se nuk planifikon të takohet me Kurtin, përveç nëse një takim i tillë mbahet në një studio televizive, ballë përballë, për ta sfiduar me shumë pyetje që i ka për të.
Gjini nuk përjashtoi një takim me krerët e PDK-së dhe LDK-së, për të biseduar mbi situatën aktuale.
