Ish-deputeti i LDK-së, Agim Veliu, ka kritikuar qasjen ndaj 6 deputetëve të Lidhjes, që publikisht deklaruan se nuk kanë votë për kandidaturën presidenciale të Bekim Sejdiut.
Sipas Veliut, rrëfimi i treshës së LDK-së bën të duket sikur konsensusi ka nisur shumë më herët, transmeton IndeksOnline.
“Ai që dikur ishte “i dobishëm” për një palë, sot na paraqitet si “i pranueshëm” për të gjithë. Në politikën tonë kosovare, me sa duket, edhe borxhet politike paguhen me poste shtetërore” ka shkruar Veliu.
Ai rekomandon që, në vend se të fajësohen 6 deputetët e LDK-së, duhet pyetur sëe përse thanë “jo”.
“Në krejt këtë histori interesash të treshes, Abdixhiku duhet t’i ndalë sulmet ndaj gjashtë deputetëve.
Ata nuk janë problemi. Problemi është lidershipi yt që nuk pranon kundërshtim dhe kërkon vetëm bindje” shkroi Veliu.
Ky është postimi i plotë i tij:
Kandidat “konsensual”
Kështu po quhet tani Bekim Sejdiu, si të ishte zbuluar papritur në tryezën e përbashkët të Kurtit, Abdixhikut e Vjosa Osmanit.
Por, sipas rrëfimit të tyre (treshes), duket se konsensusi ka nisur shumë më herët… Madje qysh atëherë kur vendimet e tij (Sejdiut) në Gjykatën Kushtetuese i leverdisnin politikisht VV-së dhe i kushtonin LDK-së.
Sot po mundohen ta shesin si zgjidhje konsensuale për President.
E dje, sipas kësaj logjike, paska qenë investim politik.
Çfarë rastësie e bukur.
Ai që dikur ishte “i dobishëm” për një palë, sot na paraqitet si “i pranueshëm” për të gjithë.
Në politikën tonë kosovare, me sa duket, edhe borxhet politike paguhen me poste shtetërore.
Kësaj radhe hiq më pak se me post Presidenti!
Në krejt këtë histori interesash të treshes, Abdixhiku duhet t’i ndalë sulmet ndaj gjashtë deputetëve.
Ata nuk janë problemi. Problemi është lidershipi yt që nuk pranon kundërshtim dhe kërkon vetëm bindje.
Nëse gjashtë deputetë thanë “JO”, ti duhet ta pyesësh veten PSE, para se t’i fajësosh.
LDK-ja nuk është pronë e askujt. As demokracia nuk është urdhër.
