BE e ka cilësuar vendimin e qeverisë së Kosovës për lirimin nga detyra të Ekipit Menaxhues për statutin e Asociacionit si shkelje të frymës së marrëveshjeve të dialogut.
Sipas Bashkimit Evropian, roli i Ekipit Menaxhues për statutin e Asociacionit të komunave me shumicë serbe në Kosovë përfundon vetëm kur ai statut të miratohet. Prandaj, sipas Bashkimit Evropian, “vendimi i Qeverisë së Kosovës për ta shkarkuar atë është në kundërshtim me marrëveshjen”.
Kështu tha edhe gjatë ditës së djeshme zëdhënësi i BE-së, Peter Stano.
“Vendimi për shpërndarjen e Ekipit menaxhues shkel letrën dhe frymën e marrëveshjeve të dialogut. Çdo vendim në lidhje me Ekipin menaxhues duhet të miratohet në kuadrin e dialogut të lehtësuar nga BE-ja”, tha zëdhënësi Stano.
Sipas tij, “palët ishin pajtuar rreth përbërjes së Ekipit Menaxhues. Anëtarët e Ekipit Menaxhues janë propozuar nga Serbia dhe zyrtarisht janë emëruar nga Kosova”, tha zëdhënësi Stano duke shtuar se “marrëveshjet e dialogut qartë thonë se ekipet menaxhuese duhet të ekzistojnë derisa të miratohet statuti i Asociacionit”.
“Ekipi Menaxhues propozoi dhe paraqiti draftin e parë, që do të thotë se nisën procesin, e jo që procesi mori fund. Prandaj, vendimi për ta shkarkuar Ekipin Menaxhues, shkel tekstin dhe frymën e marrëveshjes”, theksoi Peter Stano.
Ndaj këtyre deklaratave ka pasur reagime edhe nga Presidenca e edhe nga Qeveria.
Blerim Vela, shef i stafit të Presidentes Vjosa Osmani, vuri në pikëpyetje gjykimin e BE-së ndaj shkeljeve të mundshme që po bën njëra apo tjetra palë në dialog.
“Hej z. Stano”, iu drejtua Vela zëdhënësit të BE-së, “a do të dënoni edhe emërimet e organeve ilegale të përkohshme komunale në Kosovë nga qeveria e Serbisë? Kjo është një shkelje e qartë e të gjitha marrëveshjeve të Brukselit pasi Serbia duhet të shpërbëjë të gjitha strukturat e saj ilegale në Kosovë.”
“Apo, vetëm do merrni shënim edhe për këtë?”, shtoi Vela, duke marrë shkas deklaratën e Stanos se e kanë shënuar si vërejtje votën kundër të Serbisë për anëtarësimin e Kosovës në Këshillin e Evropës.
Po ashtu dje reagoi edhe Klisman Kadiu, këshilltar politik i zëvendëskryeministrit të parë të Kosovës, Besnik Bislimi.
Kadiu në një postim në Facebook të enjten ka thënë se vendimi i Qeverisë së Kosovës për të liruar nga detyra Ekipin Menaxhues që ditë më parë prezantoi një draft për Asociacionin e komunave me shumicë serbe, nuk është në kundërshtim me marrëveshjen.
“Nga deklarata e zëdhënësit të BE-së, vihet re se ka minimum të njohurisë për atë që po zhvillohet në procesin e dialogut, por maksimum gatishmëri në nxjerrjen e deklaratave kundër Kosovës”, kishte shkruar Kadiu.
Gjatë ditës së sotme reaguan edhe nga partia në pushtet.
Shefja e Grupit parlamentar të Lëvizjes Vetëvendosje, Mimoza Kusari-Lila, tha se deklarata e BE-së do të kishte pasur njëfarë besueshmërie nëse do të kishte kritikuar ekipin menaxhues për propozimin e draftit antikushtetues në kundërshtim me parimet e BE-së.
“Kjo deklaratë do të kishte pasur njëfarë besueshmërie, nëse BE-ja do të kishte kritikuar ekipin e MGMT për propozimin e draftit antikushtetues, në kundërshtim me parimet e konfirmuara nga BE. Është e detyrueshme për suksesin e procesit, që BE t’iu qëndroj pas parimeve të saj”, shkroi ajo.
Në takimin e 2 majit në Bruksel, mes Kryeministrit të Kosovës, Albin Kurti dhe Presidentit të Serbisë, Aleksandar Vuçiq, u prezantua draft-statuti për formimin e Asociacionit të komunave me shumicë serbe, nga Ekip Menaxhues, i përbërë prej katër pjesëtarëve të komunitetit serb.
Kryeministri Kurti pas takimit tha se draft-statuti për Asociacionin i paraqitur nga Ekipi Menaxhues “është fundamentalisht i papajtueshëm me kushtetutshmërinë, ligjshmërinë, të drejtat e njeriut, vlerat evropiane, të drejtat e pakicave sipas standardeve evropiane”.
Ai tha se ky draft dëshmon dëshirën për “Republika Srbska” në Kosovë.
“Ky draft-statut është fundamentalisht i papajtueshëm me Kushtetutën tonë dhe të drejtat e pakicave. Përkundër kësaj ne jemi të interesuar të gjejmë zgjidhje dhe unë propozova një draft vizion me 11 pika përkitazi me nenin 7 se si do të duhej të ishin vlerat dhe principet, korniza që rregullon çështjen e komuniteteve joshumicë, pakicave”, tha Kurti.
Të nesërmen, të martën e 3 majit, Ministri i Administrimit të Pushtetit lokal, Elbert Krasniqi liroi nga detyra Ekipin Menaxhues, i cili ishte ngarkuar me përgjegjësinë e themelimit të Asociacionit, në kuadër të marrëveshjeve të Brukselit të vitit 2013 dhe 2015, por Ministri Krasniqi tha se ky ekip prezantoi punën e tij me 2 maj dhe se tashmë është pa status.
“Andaj, sot me datë 03 maj 2023, kam marr vendim për lirimin nga detyra të anëtarëve të këtij ekipi menaxhues, në përbërje të Danijela Vujičić, Jelena Bolovic, Igor Kalamar dhe Dejan Radojkovic”, ka thënë Krasniqi./Reporteri.net/
